Daimi rəqabətdə olan dünyada müştərilərin davranışında hər bir dəyişikliyə reaksiya vermək vacibdir, əks təqdirdə, onlarla, hətta yüzlərlə potensial müştərini itirmək olar. Buna heç kim razı olmaz.
Təsəvvür edək ki, siz özünüzün internet mağazanızı açmısınız. Hazırkı dövrdə, müştərilər onlayn ticarətə üstünlük verdiyi bir vaxtda öz saytınıza, ya da mobil tətbiqinizə sahib olmaq vacibdir. Əks halda, biznes uğurlu olmayacaq. Bunun üçün ya veb-studiyaya, ya da frilanserə müraciət etmək lazımdır. Bu günədək hansı üsulun daha səmərəli olması barədə vahid fikir yoxdur. Biz “Frilanser və ya veb-studiya” məqaləmizdə bu məsələyə obyektiv qiymət verməyə çalışmışıq.
Beləliklə, siz ideal sayt və ya mobil tətbiq yaratmısınız, müştərilərin cəlb olunması üçün reklama pul sərf etmisiniz, xüsusi aksiyalar və təkliflər hazırlamısınız, saytınızı SEO-ya da uyğunlaşdırmısınız. Açılışı elan edirsiniz və nikbinliklə müştəri və pul axınını gözləyirsiniz. Amma belə bir mənzərə ilə qarşılaşırsınız: Müştəri sizin internet mağazaya daxil olur, müəyyən məhsulu seçir və almağa hazırlaşır, amma son anda bu məhsulu səbətə daxil edir və mağazanı tərk edir.
Ağıla gələn ilk sual bu olur: “O, niyə bu cür addım atdı?”
Gəlin aydınlaşdırmağa çalışaq.
Səbətlərin tərk edilməsi ilə bağlı iki səbəb qəbul edilib.
- Sizin nəzarət edə bilmədiyiniz səbəblər
Burada nümunə kimi qeyd etmək olar ki, müştərinin əvvəldən həmin məhsulu almaq niyyəti olmayıb, sadəcə məhsul barədə ətraflı məlumat və qiyməti öyrənmək istəyir. Bəs məhsul səbətə necə düşüb? Ola bilər, təsadüfən tıklayıb.
- Sizin nəzarət edə bildiyiniz səbəblər
Necə? Məsələn, saytı daha rahat etmək, ya da sadələşdirilmiş onlayn ödəmə tətbiq etmək
Necə? Məsələn, saytı daha rahat etmək, ya da sadələşdirilmiş onlayn ödəmə tətbiq etmək.
Əgər birinci qrupdan səbəblər sizdən asılı deyilsə, ikinci qrup üzərində işləmək olar. İnternet mağazaya daxil olmuş, məhsulu səbətə əlavə etmiş və tərk etmiş müştəri üçün təhlükəli heç nə yoxdur, amma sizin üçün bu, əsl iqtisadi faciədir. Çünki siz müştərini sayta cəlb etmək üçün resurs sərf etmisiniz, amma yekunda heç nəsiz qalırsınız. Bununla da pul itirirsiniz. Amma təəssüflənməyin, müştərini hər zaman geri qaytarmaq olar.
Müştərini səbətə necə qaytarmalı?
Müştərini seçilən məhsula geri qaytarmağın bir sıra üsulu var.
Marketinq strategiyalarından istifadə etməklə alış-verişi yarımçıq saxlamış müştərilərin 40 faizini qaytara bilərsiniz.
Bu işdə internet mağazanızdan istifadənin sadələşdirilməsi, seçilən məhsullar barədə bildirişlər vasitəsilə xatırlatmalar kömək edə bilər. Bu, məhsulların səbətdə qalmasının səbəblərini başa düşməyə və aradan qaldırmağa kömək edəcək. Amma ən vacibi öz “araşdırmanızı” aparmaq və saytınızın müştərilər üçün nə dərəcədə sadə və rahat olduğunu aydınlaşdırmaqdır.
“Səbətə əlavə et” düyməsini tıklayarkən nə baş verir?
İstifadəçi başa düşməlidir ki, onun fəaliyyəti hansısa irəliləyişə gətirib çıxarıb. “Səbətə əlavə et” düyməsi tıklanarkən bu cür üzən bildirişin çıxmasını qurmaq olar: “Sizin məhsulunuz səbətə əlavə olundu”, ya da belə bir CTA ifadədən istifadə etmək olar: “Sizin məhsulunuz səbətə əlavə olunub, birbaşa rəsmiləşdirilsin?”
Məhsul haqqında məlumat kifayət qədərdirmi?
Məhsulun tam təsvirini əlavə etməkdən qaçmayın. Təsəvvür edək ki, müştəri sayta daxil oldu. Lazım olan məhsulu seçdi, qiymətin optimallığına əmin oldu, amma bir problem var: O, məhsul haqqında ətraflı məlumatı tapa bilmədi və məlumatın olduğu digər internet mağazaların axtarışı üçün saytı tərk etdi. İmkan olduqda məhsul haqqında rəylər və təlimatlar axtarın və əlavə edin.
Bəlkə də sizin səbətiniz müştəri üçün çox gözəçarpan deyil
İnternet mağazanın dizaynı üçün yazılmamış qaydalar mövcuddur:
- Aydın və gözəçarpan “Almaq” düyməsi.
- Axtarış sətri səhifənin üst hissəsində yerləşməlidir.
Səbətin dizaynı və düzgün yerləşməsi üçün də qaydalar var ki, müştəri onu rahat tapa bilsin. Bu, səbətin səhifənin sağ yuxarı küncündə yerləşməsi, parlaq rənglə seçilməsi, müştərinin əlavə etdiyi məhsulların sayının göstərilməsidir. Bu halda biz səbətin tərk edilməsi şanslarını azalda bilərik.
Müştərini çaşdırmayın
Müştəri əmin olmaq istəyir ki, məhz sifariş verdiyi məhsulu alacaq. Məsələn, müştəri “Space Gray” rəngli MacBook sifariş verib, amma ona “Rose Gold” rəngli MacBook gətirilib. Kimin üçünsə bu, əhəmiyyətsiz ola bilər, amma əksər müştərilər üçün əsl problemdir. Bu cür xoşagəlməzliklərdən qaçmaq üçün məhsulun əsas xüsusiyyətlərini səbətdə də təkrarlayın. Müştəri məhz hansı məhsulu seçdiyini unuda bilər, ona görə də vacibdir ki, o, seçilmiş məhsulu asanlıqla tapsın. Bundan başqa, müştəriyə səbətdən məhsulu silmək, məhsul sayını və əsas xüsusiyyətləri dəyişmək icazəsi verilməsi də yaxşı qərar olar. Bu, məhsulun satın alınmasına gedən yolu asanlaşdıracaq.
Ödəmə üsulları və çatdırılma şərtləri
Müştərilər bilmək istəyir ki, ona arzuolunan məhsulu nə vaxt çatdıracaqlar və bu neçəyə başa gələcək. Ona bu məlumatlar vaxtında təqdim olunmasa, ya da ödəmənin son mərhələlərində təqdim olunsa, inanın ki, müştəri sizi tərk edəcək və fikirləşəcək ki, siz fırıldaqçısınız.
“Ecommerce Illustrated”in araşdırmalarına əsasən, müştərilərin 30 faizi çatdırılma barədə məlumatların “Ödəməyə keç” düyməsindən dərhal sonra ətraflı verilməməsinə görə, satınalmanı yarımçıq saxlayır.
Bundan başqa, ödəmə üsullarının müxtəlifliyinə də diqqət vermək lazımdır. Ödəmə üsulları çox olsa, satış şansları da çoxalır.
Ödəmə prosesi nə dərəcədə qəlizdir?
Siz ödəmə prosesini elə qurmalısınız ki, müştəriyə internet mağazanızda məhsulun ödənişi rahat olsun. Məlum olduğu kimi, bu proses uzandıqca, satış şansları azalır. Sifarişin rəsmiləşdirilməsi mərhələlərinin çox uzun olmaması üçün, məsləhət görürük ki, ödəmə prosesinin xətti ardıcıllığını istifadə edəsiniz. Bu prinsip dörd mərhələdən ibarətdir:
- Seçilmiş məhsulun təsdiqlənməsi;
- Şəxsi məlumatların daxil edilməsi;
- Ödəmə üsulunun və çatdırılma şərtlərinin seçilməsi;
- Ödəmə.
Bu mərhələləri nömrələyin və müştəriyə onun hansı mərhələdə olduğunu göstərin.
Saytda qeydiyyat
İstənilən internet mağaza müştərinin öz məlumatlarını yerləşdirməsinə məmnun olar. Bu, müştərilərlə göndərişlər, xatırlatmalar vasitəsilə “ünsiyyət qurmağa” imkan verir. Amma ən çox qıcıqlandıran amil sifarişin rəsmiləşdirilməsi zamanı qeydiyyat tələbidir. Bu fikirdən imtina etmək internet mağazanın konversiyasının yüksəlməsinə gətirib çıxara bilər.
Amma müştərilərin məlumatlarının toplanması imkanından tam məhrum olmamaq üçün, qeydiyyat prosesini minimuma endirməyi, ya da sosial şəbəkədəki profil vasitəsilə qeydiyyat imkanını təqdim etməyi məsləhət görürük.
Müştəriyə ödənilməmiş məhsullar barədə xatırladırıq
Müştərilərə ödənilməmiş məhsullar barədə xatırlatmanın bir neçə üsulu var, amma bu üsullar sizdə müştərinin elektron ünvanı və ya telefonu varsa, işləyir. Bu məlumatlardan necə istifadə etmək olar?
- “Facebook” sosial şəbəkəsi, “Google” axtarış sistemi vasitəsilə hədəf reklamının quraşdırılması.
Bu üsul ona görə rahatdır ki, siz səbətə əlavə edilmiş məhsullarla yanaşı, istifadəçiyə maraqlı olan digər məhsullar barədə reklam kampaniyası yaradırsınız.
- Əgər sizdə müştərinin telefonu varsa, ona sms-bildiriş göndərə bilərsiniz. Bu bildirişdə müştərinin səbətinə keçidi mütləq qeyd etmək lazımdır, əks halda arzuolunan nəticəni əldə edə bilməyəcəksiniz.
- Elektron məktublar vasitəsilə göndərişlər.
Müştəriyə endirim və ya fərdi təklif irəli sürmək yaxşı olar. Burada sizi heç nə məhdudlaşdırmır.
SMS göndərişləri üçün aşağıdakı xidmətlərdən istifadə edə bilərsiniz:
- SoftLine Azerbaijan
- ”ATL SMS”
- AZMARK
Email göndərişləri üçün trigger göndəriş xidmətlərindən istifadə etmək rahatdır, bu xidmətlər sizin qeyd etdiyiniz hadisələrlə bağlı avtomatik məktublar yollayır.
Biz müştərilərin tərk edilmiş səbətə qaytarılması üsullarını təhlil etdik, amma saytınızda mövcud olmalı olan digər xidmətlərə diqqət vermək lazımdır:
Geri zəng
Biz bilirik ki, bəzi istifadəçilər saytda lazımi məlumatın axtarışı ilə bağlı çətinlik çəkir. Bu insanların həmin məlumatları vaxtında öyrənə bilməsi vacibdir, beləliklə, siz müştərini həmin məhsulu almağa sövq edə bilərsiniz. Siz geri zəng təklifini əks etdirən “üzən pəncərə” yarada bilərsiniz. Bununla siz telefon nömrələri əldə edə və onları əvvəl qeyd etdiyimiz üsullar üçün istifadə edə bilərsiniz.
Onlayn məsləhətçi
Demək olar ki, bütün elektron ticarət saytlarında onlayn məsləhətçiyə sual vermək təklifinin yer aldığı üzən pəncərə görmək olar. Bundan başqa, müştəri uzun müddət ödəmə xanalarını doldurmursa, o, onlayn məsləhətçidən bütün xanaları doldurmaq və əməliyyatı bitirmək üçün kömək təklifi ala bilər.
Xüsusi həvəsləndirmələr
Qərbdə müştəriyə 1 və ya 2 saat ərzində sifariş edəcəyi təqdirdə müəyyən faiz endirimi olunacağı barədə üzən pəncərə çox populyardır. Təcrübə göstərir ki, bu üsul uğur qazanıb, ona görə də saytı tənzimləyərkən bundan istifadəni tövsiyə edirik.
Ödənməmiş məhsulların qeyd edildiyi üzən pəncərələr
Sonuncu, amma eyni zamanda əhəmiyyətli daha bir alət.
Müştəriyə ödənməmiş məhsulların qaldığını xatırlatmaq üçün onun saytı tərk etməsini gözləmək lazım deyil. Bəzən o, saytda olarkən ödənməmiş məhsulların qaldığını xatırlatmaq, bununla da sifarişin rəsmiləşdirilməsi şanslarını artırmaq vacibdir. Bunun üçün ödənməmiş məhsulların qeyd edildiyi üzən pəncərə funksiyasını işə salın.
Biznesinizin onlayn uğur əldə etməsi üçün saytın optimallaşdırılmasına diqqət yetirmək lazımdır. Biznes-sayta sahib olmağın vacibliyi barədə “Biznes-saytı üçün nə lazımdır?” məqaləsində oxuyun.
Saytın tənzimləmələrinə və optimallaşdırılmasına xüsusi diqqət yetirin. Əgər sizə bu çətin işdə kömək edə biləcək tərtibatçılar komandanız yoxdursa, bizim komandamız yüksək keyfiyyətli, sürətli və etibarlı saytın, mobil tətbiqin yaradılmasında kömək etməyə hər zaman hazırdır. Müştəriləri tərk edilmiş səbətlərə qaytarmaq üçün marketinq alətlərindən istifadə etməyi unutmayın.